PR Husu Parte Hotu Konserva Bee Rezolve Dezafiu Mudansa Klimatika

Xefe Estadu konsidera importansia krítiku ba konservasaun bee no mitigasaun mudansa klimatika iha abertura akampamentu Nasionál Permayouth 2024 iha Railaco, Munisípiu Ermera. Eventu loron haat ne’e organiza husi PERMATIL (Permakultura Timor-Leste), halibur joven liu 700 husi nasaun tomak ho tema kuda Bee Hamoris Komunidade.

Iha biban ne’e prezidente Repúblika Jose Ramos Horta louva PERMATIL ne’ebé iha inisiativa mobiliza rekursu hotu ba konservasaun bee no mitigasaun ba mudansa klimatika ne’ebé halibur mós joven lubuk ho tema kuda bee hamoris komunidade. Programa ne’e ligasaun direta entre bee no moris, nune’e partisipante sira bele foti asaun lalais hasoru mudansa klimatika. Prezidente husu solusaun pratika iha baze, hodi Kritika konferensia Internasionál sira ne’ebé la konsege produz rezultadu tanjível ba komunidade sira.

            Xefe Estadu louva direitamente diretòr Ezekutivu  PERMATIL, Ego Lemos, tanba mobiliza ona apoiu nasionál no internasionál ba inisiativa ne’e. Nune’e enkoraja partisipante joven sira atu aplika sira-nia aprendizajen husi akampamentu iha sira-nia komunidade uma laran, foka ba tekniku rekuperasaun bee no prezervasaun ambiental.

Nia hateten akampamentu tinan ida ne’e, hala’o iha suku Katrahei, ho objetivu atu fó formasaun ba joventude kona-ba jestaun bee no pratika konservasaun. Iha biban ne’e prezidente Horta haktuir tan kona-ba importansia husi Lideransa lokal, inklui Igreja, Eskola no Autoridade Munisípiu sira, hodi resolve dezafiu sira mudansa klimatika nian labele depende de’it ba intervensaun sira husi governu. Kuda Ai Knserva Bee,  Prezidente Repúblika Jose Ramos Horta hatete bee importante ba ema nia Saúde, tanba ne’e husi suku to nasionál presiza kuda ai-horis hodi konserva bee.

‘’ Ema hotu persiza kuda ai tanba oras ne’e daudaun Floresta ai-laran tuan sira tesi hotu ona tanba ne’e laiha udan nune’e husu ema hotu persiza kuda ai hodi preserva bee,’’tenik Horta. Xefe estadu hatete moris mundu ne’e buat ida importante liu ba ema ida-idak mak bee, laiha bee hotu-hotu mate, laiha bee animal mate, laiha bee ai sira mate, komforme sientista sira hatete ema sira moris iha rai seluk planeta seluk, tanba kalan hare’e fulan, maibé fulan ne’e rihun atus ba atus fulan iha la moris mesak iha universe ne’e maibé too agora uniku iha vida buat oin-oin moris iha rai planeta ida ne’e tanba iha bee, kuandu laiha bee vida iha rai nee hotu ona. Prezidente konta tuir tan katak tuir tan katak uluk sei assume kargu nu’udar Ministru Negosiu Estranjeiru, lori labarik tinan 5 balun tinan 6 too 13 ba área branka hodi hili lixu, no mós halo kampaña makaas oinsá mak hamos lixu iha sidade laran, la’os agora mak preokupa kona-ba bee. Xefe estadu ne’e hatete uluk nia la rona membru governu preokupa planeta,  rona membru governu ruma preokupa ba bee, agora iha kampaña oin-oin iha Timor no mós iha mundu, maibé ne’e tarde demais ona, tanba haree iha konferensia internasionál, baruk ona ba tanba koalia depois desizaun halo deklarasaun, maibé rai riku boot sira mak sobu mundu industria sira, tau veneno ba bee tanba ho industria oin-oin husi veneno iha mota iha tasi, maibé sira atu apoiu susar loos seidauk haree duit metan apoiu husi rai riku sira.

            Nia lembra katak uluk iha mandatu primeiru nu’udar Prezidente Repúblika, sekretariu jeral Nasoens Unidas Kofi Annan konvida nia ba koalia iha jenebra tinan 2011, nia hatete ba delegadu hotu labele ba tuir komferensia tanba sei iha falhansu boot. ‘’ Di’ak liu iha ita nia rai ida-idak ita buka halo buat ne’ebé ita bele kuda ai-rihun ba rihun, tinan 10 liu ba hau apoia programa ida naran Musan ida iha Baguia la’os hau mak lidera, maibé sira ne’ebé mak lidera husu hau nu’udar patronu husu hau nia apoiu no hau apoiu programa ne’e susesu boot kuda tian ai rihun atu tolu resin ba atus haat ona, la’os kuda arbiru maibé kuda tuir regra,’’relata PR Horta.

Nia konsidera programa kuda ai-horis ne’e di’ak, tanba hetan apoiu husi Uniaun Europeia, uluk PR rasik mos lobby makas oinsá mak Uniaun Europeia tau osan ba probrama ho naran Musan ida para kuda ai tuir buat ne’ebé ema hatene. ‘’ Ita tenke kuda ai nakonu iha Timor-Leste Floresta laran ai-laran udan lamai ne’e akontese iha rai barak,’’ katak Horta.

            Prezidente hatete solusaun di’ak mak iha ida-idan nia adeia no suku lidera husi Xefe suku no Xefi aldeia mestri sira eskola ho igreza hamutuk prezidente munisípiu no administrador kuda ai hodi preserva bee, labele hein governu.

Editor :  Godinho Barros

Fontes : STL-Media